Thursday, January 15, 2009

الجزء الأول - يا قمة ما تمت .. خدها الخاين وطار




يا قمة ما تمت .. خدها الخاين وطار

المشهد الأول :
( مشهد داخلي في القصر )

سوزي : أبو علاء .. قوم يا أبو علاء ... أبو علاء ... قوم بقه اتأخرت
أبو علاء : ايه هيه الساعة كام دلوقت
سوزي : الساعة عشرة ونطاط الحيط مستنيك من الساعة 6 تحت في الصالون
أبو علاء : ياه يا سوزي وسيباني لغاية دلوقت مش أنا قايل ليكي تصحيني الساعة عشرة إلا خمسة ... اديني هتأخر على الراجل تحت .
يصحو أبو علاء ويغير ملابسه وينزل لمقابلة نطاط الحيط في صالون القصر

( نطاط الحيط يتحدث في الهاتف )
نطاط الحيط : لا لا هيه الدوحة نوياها نوياها مسلطه علينا الجزيرة من أول الحرب وجاية دلوقتي تقول قمة بس إحنا بعون الله هنفركشهالهم .
أبو علاء : بتكلم مين يا نطاط ؟
نطاط الحيط يضع يده على سماعة الهاتف ويجيب ده عبده دينار فخامتك بيكلم من عمان .. بيشوف هنعمل ايه في الورطة دي .
أبو علاء : هات السماعة ... يأخذ أبو علاء سماعة الهاتف ويتحدث ... ازيك يا عبده ...أهلا يا سيدي ...والله يا أخي الناس بتوع قطر دول بيستعبطو كل شوية يطلع يقلك قمة يبقى يقابلني لو حد راحله .
عبده دينار : طيب وأنا أعمل ايه يا ريس ، اتصلوا بيه أكتر من مرة وانا مردتش وبعدين فيه 9 دول والنصاب ممكن يكتمل .
أبو علاء : لا لا ابدا انت اقفل تليفوناتك وادخل نام ومتخليش حد عندك يصرح اي تصريح وانا هكلمك بعد ما اخلص قعدتي مع عبده شريعة في الرياض .
عبده : طيب لو فخامتك رايح ما اقابلك هناك ؟
أبو علاء : لا لا يمكن نطلب منك تسافر لحد جنبك علشان تقوله يعمل ايه في موضوع القمة لأني قلقان أوي من سوريا والعراق انهم يوافقوا .
عبده دينار : بس انا مش هينفع اروح سوريا زي ما انت عارف
أبوعلاء : يا سيدي هنشوف نعملها ازاي بس خليك في بلدك ... يالله مع السلامة .
عبده دينار : مع السلامة يا ريس على تليفونات بقى .

نطاط الحيط : طيب وأنا مش هاجي معاك يا ريس ؟
أبو علاء : تيجي معايا فين هو أنا رايح الملاهي ... اقعد هنا البلد فاضية ... الواد جيمي خليته ياخد الحزب ولجنته ويطلع بيهم على العريش واظن انه هيقعد يومين هناك ويمكن يروح يقضي يومين كمان في شرم ... مش عاوزين البلد تبقى فاضية في وقت زي ده .
نطاط الحيط : طيب يا ريس احنا النهاردة هناخد رأي بتوع حماس في المبادرة ناخدها منهم ونسكت ولا نناقشهم فيها ولا نرفض كلامهم خالص .
أبو علاء : شوف عمر هيعمل ايه أنا مرتب كل حاجة معاه ... ويالله بقى اتصل لي ببتوع الحرس علشان اروح المطار .
نطاط الحيط : مش هتفطر يا ريس
أبو علاء : لا النهاردة الاثنين صايم .
نطاط الحيط : لا النهادرة التلات يا ريس
أبو علاء: الاتنين التلات مش فارقة أه كله سنة

المشهد الثاني :
مشهد خارجي في الطائرة في الجو الساعة 12 ظهرا
أحد الحرس : صباح الخير فخامتك
أبو علاء : صباح النور يا سيدي اتصلي بعمر على التليفون وهاته
الحارس : أجيب التليفون ولا أجيب عمر فخامتك
أبو علاء : هاتجيب عمر ازاي على الطيارة وهيه طايرة ... هاته على التليفون طبعا .
الحارس : عمر باشا على التليفون فخامتك ... اتفضل .

أبو علاء : ايه الاخبار عندك يا عمر ؟ .... بص انا عاوزك تطول المفاوضات مع بتوع حماس على قد ما تقدر لغاية ما اوصل واخلص قعدتي مع عبده شريعة ... ومتديهمش عقاد نافع في حاجة اشتري منهم ومتبعش وابقى اتصل بيه قلي ايه الاخبار .
عمر : حاضر فخامتك بس الناس اللي جاية من تركيا دي خنقانا أوي وعمالين يقولوا الوضع مأساوي ولازم نعجل ولازم نوصل لحل سريع ومصربعنا على الاخر وبعدين بتوع اسبانيا كمان بيقولوا ان كلام بتوع حماس منطقي في بعض النقاط .
أبو علاء : بقلك ايه اتلكك على اي حاجة واقلب وشك واعلن توقيف النقاش لمدة ساعتين تلاته .
عمر : حاضر فخامتك تيجي بالسلامة ... معلش مضطر اقفل معاك لان ليفني على التليفون التاني فخافتك .
أبو علاء : طيب خلص معاها ولو فيه حاجة مهمه قلي يالله مع السلامة .
عمر : مع السلامة فخامتك وسلملنا على عبده شريعة .

أبو علاء ينادي على أحد الحراس ... فين يا ابني المضيفة تجيب لينا فطار وحاجة نشربها أنا ريقي نشف من كتر الكلام .
الحارس : اسفين فخامتك سمعنا من معالي الوزير ان حضرتك صايم علشان النهاردة الاتنين .
أبو علاء : صايم ... يا ابني النهاردة التلات حد يصوم يوم التلات .
الهاتف يرن
أبو علاء : ألو أيوة يا عمرو إيه الاخبار ؟
عمرو : يا ريس العددد بقى 11 فخامتك ولو كمل 15 قطر هتحرجنا وتعقد القمة
أبو علاء : مين تاني ... المهم ميكنش الكويت ولا الأمارت ولا العراق فيهم
عمرو : لا دول لسه محدش رد فيهم ... بس الكويت كلمتهم قالوا مستنيين الأمير لما يصحى ويشوفوا يعملوا ايه .
أبو علاء : طيب قطر أعلنت إنها جاية ولا لأ ؟
عمرو : ثواني اتأكد لحضرتك ....... يا ريس ده القمة أصلا في قطر .
أبو علاء : أه أه طيب خلاص ... اقفل دلوقت ولو حد تاني أكد ابقى قلي سلام .
أبو علاء يتناول فطور ويشرب الشاي وبعض العصائر ويغلق هاتفه ليستريح ساعة قبل أن يصل إلى الرياض







2 comments:

عصفور طل من الشباك said...

على فكرة إحنا ظالمين الراجل ما هو مقطع نفسه أهو

صاحي من الساعة عشرة وبعدين ومن غير فطار على الطيارة عدل

بلا ربنا يكرمه زي ما كرم السادات أو يكرمهم كلهم مرة واحدة زي ما محمد علي أكرم الأمراء في عزمة القصر إياها

Anonymous said...

enta mota'aked men mawdo3 enoh abo 3ala' fe3lan