المشهد الثالث :
استيقظ ابو علاء على صوت حركة الطائرات في مطار الرياض نادى على أحد الحراس متسائلا إحنا فين دلوقت يا ابني ؟
الحارس : فخامتك إحنا وصلنا الرياض
أبو علاء : وايه اللي جبنا الرياض هتمونو بنزين ولا ايه ؟
الحارس : لا يا ريس سمو الملك عبده شريعة منتظرك في الرياض
أبو علاء : آه آه افتكرت نظر في الساعة فوجدها تقارب الثالثة فبدأ بتجهيز نفسه لمراسم الاستقبال الملكي .
الملك عبده شريعة : يا هلا يا مراحب يا فخامتك والله مشتاجين يا أبو علاء
أبو علاء : يا اهلا بسموك ، واحنا والله مشتاقين ... ايه الاخبار طمني
عبده شريعة : ليش متصربع بتستريح تاخد نفساك وترتب حالك وناكل عيش وملح زي ما بتقولوا في مصر ونكلم
أبو علاء : لا سموك مفيش وقت للكلام ده عاوزين نشوف هنعمل ايه بسرعة وبعدين انا صايم النهاردة الاتنين زي ما انت عارف .
عبده شريعة : والله انت صايم مثلي والله انا بردو بصوم كل اتنين وخميس ... بينا علجصر .
يذهب الزعيمان الى القصر ويجلسان في قاعة مذهبة بعد العصر ويتناولان بعض الاطعمة والمشروبات ويبدء النقاش
أبو علاء : دلوقتي موضوع القمة بتاع الدوحة ده لازم نخلصه ونرتب هنعمل ايه بالضبط .
عبده شريعة : اه والله موضوع بيصير خطير ، وما في حل إلا اننا نروح لو بيكتمل النصاب
ابو علاء : مش هيكتمل النصاب يعني مش هيكتمل النصاب
عبده شريعة : كيف يا ابو علاء ... العدد بيوصل 14 ولسه يومين وممكن النصاب بيكمل في اي وقت
أبو علاء : يكتمل امال احنا قاعدين نعمل ايه متقلقش احنا معانا المحبس العمومي وفي الاخر القمة بتاعتنا يعني يوم ما تكمل وده مش هيحصل هنخلي عمرو يعلن ان مفيش قمة وان النصاب مكتملش .
عبده شريعة : يعني احنا اتنين وباجي سبعة كمان علشان نوجف هالقمة ... وأنا ما بعرف ايش نجول اصلا ليش ما بنروح القمة في هالوقت
أبو علاء : بص احنا نعلن ان القمة تبقى في الكويت ونسخن بتوع الكويت على قطر ونعلن ان انا وانت بنعتبر ان القمة الاقتصادية فرصة للكلام في موضوع غزة وبكده هنقعد الكويت ومش هتروح ، وهنتصل بالامارات نقول لها ان ايران هتحضر وان احنا طلبنا من قطر ان الوضع لا يسمح بوجود ايران في الوقت ده بينا احنا لان فيه حساسيات بين كتير من الدول العربية وايران ونقول للإمارات ان قطر رفضت وقالت انها بالفعل ارسلت دعوة ومعملتش اعتبار لكلمنا
عبده شريعة : طيب وانا كمان ما بروح لو ايران بتروح
ابو علاء : مه إنت كده كده مش رايح سموك
عبده شريعة : طيب كده الإمارات ما بتروح الدوحة هيه والكويت .... طيب والباقي
ابو علاء : انت بتعمل بكرة اجتماع سري للزعماء الخليجيين وتروج موضوع وجود ايران في القمة وتعتب على أمير قطر بشدة في دعوته واحراجه ليكم انه دعا نجاد ، وتقول له انكم كلكم فهمتم انك كده بتقول لينا منجيش وبتحرجنا وطبعا مش انت بس اللي هيعتب عليه هتلاقي الكويت والإمارات .
عبده شريعة : طب ليه ما بعملها قمة خليجية بحيث انها تحسب لمجلس التعاون الخليجي بس إيش نسوي في موضوع القرارات والله ما في قرارات ... ايه رأيك يا ابو علاء في القرارات ايش نقول
ابو علاء : والله اي حاجة المهم تطلعوا قرارات مثلا ... متابعة الجهود لحل ازمة غزة .... ضرورة قبول المبادرة المصرية من الطرفين
عبده شريعة : ثواني ابو علاء ثواني بريد اكتب القرارات ...... طيب كده يبقى الكويت والامارات والبحرين ووالسعودية ... طيب بتوع عمان اصلا موضوع ايران ده ما بيفرق معاهم واليمن ما بيحضر معنا وهيروح
ابو علاء : احنا معانا تونس اعلنت مش رايحة والمغرب اعلنت مش رايحة وانا هقول لعبد الله دينار ميرحش وانا مصر مش رايح يبقى عاوزين اليمن أو اي دولة كمان متجيش
عبده شريعة : أنا بعرف أمنع اليمن
أبو علاء : والله حاجة تقرف مش عارف ايه جيبوتي وجزر القمر والصومال ايه دخل دول في القضية ولا ايه علاقتهم بالقضية
عبده شريعة : والله كلامك زين الجضية دي بتاعتنا احنا ، لكن نجول ايه ابو علاء دي اصوات ولها قرار في النصاب
ابو علاء : طيب انت ازاي تظبط مع اليمن ... انا بقلك من أبو صلوحة كتير وليه ساعات تصرفات غريبة
عبدالله شريعة : ما تحمل همه والله عشرة مليون دولار يخلوه ما يخرج من صنعا اسبوع
ابو علاء : لا سموك بلاش اسبوع ... احنا عاوزينه يوم الاتنين في الكويت .. وبعدين انت هتديله عشرة مليون علشان مش هيروح طيب أنا رايح اديني انا بقه عشرة مليون علشان مرحش
عبد الله شريعة : والله لك الخير كله ابو علاء انت بركتنابس ايه رأيك يا ابو علاء في موضوع القمة الخليجية ده والله بركات وفتوحات من السماء بتنزل علينا واحنا قاعدين
يدخل أحد الحراس ويقول لهما المغرب أذن سموك ومادبة الفطار جاهزة ... يدخل أبو علاء متقدما وخلفه سمو الملك عبد الله ويتمتمان بدعاء الافطار ويتناولان إفطارهما
1 comment:
تصوير رائع يا وليد بس كان نفسي في خلفيات مهمة زي إنه أبو علاء مشهور بسماع دبة النملة!!!! وكمان متهيأ لي فناجين القهوة العربي اللي كانوا بيضروبها دي إنها antibiotic ولا إنت رأيك إيه؟؟ يا خوفي ليكون شراب عصير مركز أحمر من ثرى غزة الدامية!!!!
Post a Comment